Klein Curaçao ta un isla chikí sin habitante ku ta situá aproksimadamente 11 kilometer di kosta di Kòrsou den direkshon sùit wèst. E sitio ta konosí pa su refnan di koral sumamente bunita, su diversidat grandi di piská i biomasa, i komo e lugá di brui i kriansa pa vários espesienan di reptil marino i para. Klein Curaçao a keda identifiká komo un sitio Ramsar na 2018.

E mishon di e Konvenshon Ramsar ta e konservashon i uso responsabel di tur área di moeras via di akshonnan lokal i nashonal i kooperashon internashonal. Esaki ta komo un kontribushon pa logra desaroyonan sostenibel rònt mundu.

Union Europeo a pone disponibel un funding komo parti di e di diesun Programa di Fundashon Europeo pa Desaroyo Caribe Regional pa Resilensia, Energia Renovabel i Biodiversidat Marino (RESEMBID). Un di e proyektonan finansiá pa e programa RESEMBID ta un “Plan di Desaroyo pa Área di Moeras di Ramsar di Importansia Internashonal #2355: Klein Curaçao” (en adelante referí komo Klein Curaçao). Ministerio di Salubridat, Medio Ambiente i Naturalesa (GMN) ta e aplikante prinsipal pa e ehekushon di e Plan aki, i e finansiamentu a ser reglá den kolaborashon ku Ministerio di Asuntunan General.

E enfoke di e Plan lo ta pa desaroyá strategianan pa protehá e rekursonan natural di Klein Curaçao i alabes permití e uso sostenibel di e área aki pa tantu bishitante komo residentenan di Kòrsou.

E proyekto lo krea mas balor posibel pa avansá un mihó maneho di e awanan ku ta rondoná e isla, desaroyo di protokòlnan di largo plaso pa monitòr bida marino einan, fomentá konsientisashon públiko, i na mesun momentu kontribuí na e “Agènda di aña 2030 di Ophetivonan di Desaroyo Sostenibel”, kual ta den e “Plan di Desaroyo di Kòrsou 2015-2030”.

E resultadonan klave ta:

1. Establesé un sistema general di duna pèrmit pa fasilitá e maneho di e uso di Klein Curaçao komo sitio pa aktividatnan rekreativo i turístiko;
2. Establesé un struktura di investigashon i opservashon pa brinda evaluashon kontinuo di e eko-sistema di e isla;
3. Formulá un Plan di Desaroyo pa Klein Curaçao;
4. Implementá un plan nashonal di konsientisashon i komunikashon;
5. Formulá i establesé un struktura di finansiamentu pa sostené esfuersonan di protekshon ambiental riba Klein Curaçao.